Գ Ա Լ Ո Ւ Ս Տ

Գ Ա Լ Ո Ւ Ս Տ

Եկեղեցական Տօնացոյցին համաձայն, Տէր Յիսուս Քրիստոսի Ծնունդը տօնելու պատրաստութեան  ժամանակաշրջանը, որ կը սկսի Ծնունդէն չորս շաբաթներ առաջ, կը կոչուի՝ Գալուստ:

Եսայեայ մարգարէն կը մարգարէանար Տէր Յիսուսի աշխարհ գալուն որ պիտի կոչուէր՝ Սքանչելի Խորհրդակից, Հզօր Աստուած, Յաւիտենականութեան Հայր, Խաղաղութեան Իշխան (Ես. 9.6բ.):

Գալուստը յիշեցում մըն է մարդ արարածին, որ չտարուի տարբեր տեսակի պատրաստութիւններ տեսնելով եւ մոռնայ Ծնունդին իսկական արժէքը: Առանց Տէր Յիսուսի, Սուրբ Ծնունդը կը դառնայ կերուխումի առիթ եւ տօն:

Գալստեան շրջանին, հաւատացեալը կանչուած է աղօթքով յիշելու Աստուծոյ սէրը, ողորմութիւնը եւ շնորհքը որ յայտնուեցաւ Տէր Յիսուսի միջոցաւ եւ Անոր հրաշափառ յարութեամբ յաղթական կեանք շնորհուեցաւ բոլոր անոնց որոնք կ’ընդունին զԻնք որպէս Տէր եւ Փրկիչ:

Եկէք աղօթքով պատրաստուինք դիմաւորելու եւ տօնելու Տէր Յիսուսի Ծնունդը:

                                                                                                                                              Ս.Ճ.Մ.

Հ Ո Վ Ո Ւ Ա Կ Ա Ն   Դ Ա Ս Ա Ր Ա Ն

                       -Երկշ.  5 Դեկտ., երեկոյեան ժամը՝ 9-ին, Էմմ. Եկեղեցիին սրահին մէջ:

                            -Հինգշ. 8 Դեկտ.,  առաւօտեան ժամը՝ 9-ին. Էմմ. Եկեղեցիին սրահին մէջ:

Ք. ՋԱՆԻՑ ՊԱՇՏԱՄՈՒՆՔՆԵՐ...

    - Կիրակի, 13 Նոյեմբերի պաշտամունքը առաջնորդեց՝ Օրդ. Մարինա   Փոստաճեան, փառաբանութեան երգերով եւ վկայութիւնով մը:

Տիկ. Վիքի Փիւրզէկեան փոխանցեց օրուան նիւթը՝ «Կառավարէ՛ Բարկութիւնդ»   հիմնուած՝ Կող. 3.5-14 համարներուն վրայ: Ան յիշեց թէ բարկութիւնը բնածին է ,    ուշադիր ըլլանք զանազանելու ջղայնութիւնը՝ բարկութենէն: Նաեւ անդրադարձաւ   որ  երբ բարկանանք մեղք չգործենք, այլ ուշադիր ըլլանք մեր խօսքերուն, որպէսզի    մարդոց չվիրաւորենք եւ մեր յարաբերութիւնները սիրով մշակուած ըլլան:

Պաշտամունքը վերջ գտաւ յայտարարութիւններով, Ջանից քայլերգով եւ բաժանման    աղօթքով:

   -Կիրակի, 27 Նոյեմբերին, Էմմանուէլ Ջանից Վարչութեան հրաւէրով,  պաշտամունքին ներկայ եղան Նահատակաց Եկեղեցիի Ջանիցականները:

Պաշտամունքը  առաջնորդեց՝ Յակոբ Պօզեագալեան, փառաբանութեան երգերով եւ    պատմութիւններով անդրադարձաւ թէ երբ Տէր Յիսուսի հե-տեւինք, այն ատեն շիտակ    ճամբու մէջ կը մնանք:

Բժշկհ. Աննա Թահմիզեան փոխանցեց օրուան բժշկական նիւթը: Ան անդրադարձաւ տարրալուծարանէն ներս տարուած աշխատանքին, քննութիւններուն եւ նախ քան  քննութեան հիւանդին պարտականութիւններուն: Նաեւ յիշեց տարրալուծարանէն ներս    պատահած հարցերն ու սխալները:

Պաշտամունքը վերջ գտաւ յայտարարութիւններով, Ջանից քայլերգով եւ Վեր. Սերոբ    Մկրտիչեանի Օրհնութեան աղօթքով:

ՏԻԿՆԱՆՑ ՊԱՇՏԱՄՈՒՆՔ... Հինգշաբթի, 1 Դեկտեմբերի պաշտամունքը   առաջնորդեց՝ Տիկ. Սալբի Պօզեագալեան, փառաբանութեան երգերով, 138-րդ   Սաղմոսի   ընթերցումով եւ խորհրդածութիւնով մը՝«Մեր մնայուն երջանկութիւնը   Աստուծմէ կախեալ է»: Նաեւ կարդաց պատմութիւն մը աղօթքի զօրութեան մասին եւ   տեղի ունեցաւ աղօթքի պահ:

Տիկ. Մարիա Սանոսեան-Մսրլեան, փոխանցեց օրուան հոգեբանական նիւթը՝ «Կնոջ Տարիքային Հանգրուաններու Յատկութիւններ Եւ Անոր Դերը Սերունդներու Յարա-բերութեան Մէջ»: Ան յիշեց թէ կնոջ նկարագիրը  կ’անցնի տարբեր շրջաններէ. ինչպէս՝ Երեսունական շրջան. –միջին տարիքի՝ Յիսունական. _Եօթանասունէն ետք: Ապա   անդրադարձաւ ամէն մէկ տարիքի ժխտական կէտերուն, առաւելութիւններուն եւ   յաղթահարելու միջոցներուն:  Զրոյցը վարեց՝ Տիկ. Մսրլեան եւ  մասնակցեցան՝ երեք   շրջանի սերունդներէ՝ Տիկք. Վարսենիկ Մկրտիչեան, Պէթի Հաթէմ եւ Վիքի   Փիւրզէկեան: Անոնք զրուցեցին այս նիւթին շուրջ եւ Աստուածաշունչէն լսելով   համարներ, անդրադարձան Եօթը կարեւոր կէտերու.-1-Նախքան խօսիլը ու   ընդհատելը մտիկ ընել. 2-Դիմացինը հասկնալու եւ ճանչնալու համար հարցում    հարցնել. 3-Յարգանք արտայայտել. 4-Պատուելը ու յարգելը  վարժութիւն ընել. 5-Դիմացինը այպանելու՝ նախ մեր մասին խօսիլ. 6-Տալ լաւագոյնը առանց պահանջելու կամ ակնկալելու. 7-Ամէն բանէ առաջ եւ վեր է՝ ՍԷՐԸ:

Պաշտամունքը վերջ գտաւ յայտարարութիւններով եւ Բերնիս Խօսքերը աղօթքով: 

Ք.Ջ. ՄԻԱՑԵԱԼ ՊԱՏԱՆԵԱՑ ՊԱՇՏԱՄՈՒՆՔ... Կիրակի, 27 Նոյեմբերի  պաշտամունքը առաջնորդեց՝ Պրն. Յարութ Պարտագճեան:

Վեր. Սերոբ Մկրտիչեան, պատասխանեց 13 Նոյեմբերի պաշտամունքին, պատանիներուն կողմէ  թղթիկներու վրայ արձանագրուած, Աստուածաշունչէն անհասկնալի   նիւթերը եւ հարցումները: Ան եզրափակեց ըսելով թէ՝ պէտք է սերտենք եւ գիտնանք   Աստուածաշունչը, որպէս հաւատքի կանոն  եւ ոչ թէ գիտական գիրք, նաեւ զԱստուած   ճանչնալու համար, Աստուա-ծաշունչը  հաւատքով եւ վստահութեամբ պէտք է      կարդանք:

Պաշտամունքը վերջ գտաւ  յայտարարութիւններով, ՊԱ քայլերգով եւ Վեր.. Սերոբ   Մկրտիչեանի աղօթքով:

ՅԻՇԵՆՔ... Աստուծոյ փառք տալ եւ բաժին մը հանել Եկեղեցիի «Մէկ Քիլօ» պաշարի բարեսիրական ծրագրին, որ պիտի բաժնուի Նոր Տարուայ եւ Սբ. Ծնունդի առթիւ կարիքաւոր ընտանիքներուն:

                ՀԱՅ ԱՒԵՏ. ԷՄՄԱՆՈՒԷԼ ԵԿԵՂԵՑԻԻ ՏԻԿՆԱՆՑ ՊԱՇՏԱՄՈՒՆՔ               

                             ԾՆՈՒՆԴԻ ՊԱՏՄՈՒԹԵԱՆ ՄԷՋ ԿԱՐԵՒՈՐ ԴԷՄՔԵր

« ԱՆՆԱ ԵՒ ԵՂԻՍԱԲԷԹ »

Ներկայացնողներ՝ Ժանէթ Պարտագճեան եւ Մարի Թաշճեան    

                         Հինգշաբթի, 8 Դեկտ.  2011, կ.ա. ժամը՝ 10-ին, Էմմ. Եկեղեցիին սրահին մէջ:

ՊԱՏՄԱԿԱՆ  ՀԱՅԱՍՏԱՆԻ ԵԿԵՂԵՑԻՆԵՐՈՒ ՆԵՐԿԱՅԱՑՈՒՄ...

Ուրբաթ, 25 Նոյեմբերին, երեկոյեան ժամը՝ 8.30-ին, Հայ Աւետ. Էմմանուէլ Եկեղեցիի Երիտասարդ Զոյգերու Յանձնախումբի կազմակերպութեամբ տեղի ունեցաւ հանդիպում մը Եկեղեցիիս սրահին մէջ:

Ներկաները տեսաերիզի միջոցաւ դիտեցին եւ ունկնդրեցին Տիար Գէորգ Գրիգորեանը, որ ցոյց տուաւ պատմական Հայաստանի մէջ գտնուող  զանազան փլատակ Եկեղեցի-ներ, որ առիթը ունեցած էր պրպտելով գտնելու, այցելելու եւ տեսնելու անոնց քանդուած ցաւալի վիճակները ներկայիս:

Վեր. Սերոբ Մկրտիչեանի փակման եւ շնորհակալական խօսքով եւ Օրհնութեան աղօթքով վերջ գտաւ հանդիպումը:

Ներկաները հիւրասիրուեցան Յանձնախումբին կողմէ եւ տեղի ունեցաւ հաղորդակցական պահ:

...ՆՈՒԻՐԱՏՈՒՈՒԹԻՒՆ ...

Իրենց քրոջ՝ Սիւզի Թուխմանեանի յիշատակին.-

Տէր եւ Տիկ. Ղուկաս եւ Ցոլինէ Թաթարեան                                 Եկեղեցիին 1000 ս.ո.

Ամուսնոյն եւ Հօր՝  Տիար Յովհաննէս Պարտագճեանի յիշատակին.-

Տիկ. Ժանէթ Պարտագճեան                                                            Եկեղեցիին 500 ս.ո.

Տէր եւ Տիկ. Յարութ եւ Լիզա Պարտագճեան                                          “         500 ս.ո.

ՇՆՈՐՀԱԿԱԼՈՒԹԻՒՆ... Տէր եւ Տիկ. Ղուկաս եւ Ցոլինէ Թաթարեաններուն, որ հիւրասիրեցին Եկեղեցիիս ժողովուրդը անցեալ Կիրակի օր, իրենց քրոջ՝ Սիւզի Թուխմանեանի յիշատակին: