ԵԿԵՂԵՑԻՆԵՐՈՒ ՄԻԱԲԱՆՈՒԹԵԱՆ

Home Page / Newsletters / ԵԿԵՂԵՑԻՆԵՐՈՒ ՄԻԱԲԱՆՈՒԹԵԱՆ

ԵԿԵՂԵՑԻՆԵՐՈՒ ՄԻԱԲԱՆՈՒԹԵԱՆ

ԱՂՕԹՔԻ ՇԱԲԱԹ

(18-25 Յունուար 2012)

 

 

Քրիստոնեայ Եկեղեցիներուն համար Յունուար ամսուան երրորդ շաբաթը կը բնորոշուի որպէս՝ Եկեղեցիներու Միաբանութեան Աղօթքի Շաբաթ:

Այս տարուան բնաբան համարն է՝ «Ամէնքս ալ պիտի փոխուինք Տէր Յիսուս Քրիստոսին յաղթութեամբ» (Ա. Կորնթ. 15.51-58):

Իսկ շաբթուան ընթացքին հետեւեալ նիւթերը եւ համարները նկատի առնուած են.-

-Առաջին օրը՝ «Փոխուած՝ Սպասաւոր Քրիստոսով», հիմնուած՝ «Որդին մարդոյ եկաւ սպասաւորութիւն ընելու» (Մարկ. 10.45):

-Երկրորդ օրը՝ «Փոխուած՝ Սպասելով Տիրոջ Համբերութեամբ», հիմնուած՝ «Թող տուր հիմա, վասնզի այսպէս կը վայելէ մեզի, որ բոլոր արդարութիւնը կատարենք» (Մատթ. 3.15):

-Երրորդ օրը՝ «Փոխուած՝ Չարչարուող Ծառայով», հիմնուած՝ «Քրիստոս ալ մեզի համար չարչարուեցաւ» (Ա. Պետր. 2.21):

-Չորրորդ օրը՝ «Փոխուած՝ Տիրոջ Չարին վրայ Յաղթութեամբ», հիմնուած՝ «Բարիով յաղթէ՛ չարին» (Հռովմ. 12.21):

-Հինգերորդ օրը՝ «Փոխուած՝ Յարուցեալ Քրիստոսի Խաղաղութեամբ», հիմնուած՝ «Յիսուս անոնց մէջտեղը կայնեցաւ ու ըսաւ. «Խաղաղութիւն ձեզի» (Յովհ. 20.19):

-Վեցերորդ օրը՝ «Փոխուած՝ Աստուծոյ հաստատ սիրով», հիմնուած՝ «Մեր հաւատքն է, որ աշխարհին կը յաղթէ» (Ա. Յովհ. 5.4):

-Եօթերորդ օրը՝ «Փոխուած՝ Բարի Հովիւով», հիմնուած՝ «Արածէ՛ իմ ոչխարներս» (Յովհ. 21.17):

-Ութերորդ Օրը՝ «Միաբան՝ Քրիստոսի Թագաւորութեան Մէջ», հիմնուած՝ «Ան որ կը յաղթէ, ինծի հետ իմ աթոռս պիտի նստի» (Յայտ. 3.21):

Հաւատացեալներ կանչուած են Քրիստոսով փոխուած կեանք ապրելու:

Եկեղեցիներու Միաբանութեան Աղօթքի Շաբթուան առիթով, Եկեղեցին (հաւատացեալներու խումբը) կանչուած է կատարելու ինքնաքննութիւն եւ Տէր Յիսուս Քրիստոսով փոխուած, նորոգուած եւ Իր սիրով, միաբանութեամբ, խաղաղութեամբ եւ յոյսով լեցուած յաղթական կեանք ապրելու: Ամէն:                                                                                                                    

                                                                                                                                                                                                 Ս.Ճ.Մ.

 

 

 

ԵԿԵՂԵՑԻԻ ԽՆԱՄԱԿԱԼՈՒԹԵԱՆ ԸՆՏՐՈՒԹԻՒՆ...

Փառք կու տանք Աստուծոյ որ Կիրակի, 15 Յունուար 2012-ին, պաշտա-մունքէն անմիջապէս ետք տեղի ունեցաւ Եկեղեցիի Խնամակալութեան ընտրութիւնը որ տուաւ հետեւեալ արդիւնքը.-

Խնամակալութեան մէջ իրենց ծառայութեան շրջանը ամբողջացնող անդամներն էին.- Տեարք՝ Գեղամ Չոլաքեան, Գօգօ Պօզեագալեան, Պերճ Սանոսեան, Գէորգ Գրաճեան եւ Տիկ.Վերա Բարեջանեան:

Երկու տարիներու (2012 եւ 2013) համար ընտրուեցան.- Տեարք՝ Յարութ Հաճեան, Կարօ Բ. Պետիրեան, Վահրամ Մանուկեան, Րաֆֆի Պօզեագալեան եւ Յակոբ Չիւրիւքեան:

Շնորհակալութիւն կը յայտնենք ծառայութեան շրջանը ամբողջացնող անդամներուն:

Կը շնորհաւորենք նոր ընտրուողները եւ կը մաղթենք իրենց օգտաշատ ծառայութիւն Աստուծոյ փառքին եւ Եկեղեցիին շինութեան համար:

 

 

ՍՐԲԱԶԱՆ ԵՒ ԴԱՍԱԿԱՆ ՀԱՄԵՐԳ...

    Հայ Աւետ. Էմմանուէլ Եկեղեցիի կազմակերպութեամբ եւ Եկեղեցւոյ հիմնադրութեան 160 ամեակի առիթով, տեղի ունեցաւ սրբազան եւ դասական համերգ մը, Ուրբաթ, 13 Յունուար, 2012-ին, երեկոյեան ժամը՝ 8.30-ին, Հայ Աւետ. Էմմանուէլ Եկեղեցիին մէջ:

Բացման խօսքի փոխարէն, համերգը սկսաւ Եկեղեցւոյ Հովիւ՝ Վեր. Սերոբ Մկրտիչեանի աղօթքով, որ նաեւ յատուկ աղօթք բարձրացուց առ Աստուած Սուրիոյ խաղաղութեան համար:

Յայտագրին առաջին բաժինը կ’ընդգրկէր շարականներ, ինչպէս Եկմալեանի՝ «Սուրբ Սուրբ»ը եւ «Միայն Սուրբ»ը: Նաեւ համաշխարհային սրբազան երաժշտութենէն, Վիվալտիի՝ «Domine Deus,Iargo», «Domine Deus, Agnus Dei,adagio» եւ այլ կտորներ:

Վերոյիշեալ բաժինին մէջ իրենց մասնակցութիւնը բերին Նարեկացի Երգչախումբը, ղեկավարութեամբ՝ Եղիշէ Վրդ. Ճէնճիի, մենակատարութեամբ՝ Տիկ. Լուտմիա Արապաթլեանի, դաշնակի ընկերակցութեամբ՝ Տիկ. Նորա Սարգիսեան-Մարտինիի:

Յայտագրին երկրորդ բաժինը կ’ընդգրկէր Հայկական դասական երաժշտութիւն:

Հայրենի տաղանդաւոր երաժիշտներ՝ Տիկ. Գայանէ Շէվշէնքօ՝ Ջութակ, Պրն. Միքայէլ Կունտիրէվ՝ Թաւջութակ եւ Օրդ. Գայանէ Քոչարեան՝ Դաշնամուր նուագեցին Հայկական կտորներ ինչպէս՝ Պապաճանեանի՝ Էլեկիան, Սաթեանի՝ Nocture, Սպենդիարեանի՝ Այվարդը, Կոմիտասի Կռունկը եւ այլ երաժշտական կտորներ:

Համերգի աւարտին, Վեր. Մկրտիչեան իր փակման խօսքին մէջ գնահատանքով անդրա-դարձաւ տաղանդաւոր երաժիշտներու կատարողութեան եւ յուշանուէրով պատուեց յայտագրին բաժին բերողները: 

Համերգը վերջացաւ Վեր. Յարութիւն Սելիմեանի սրտի խօսքով եւ Առաքելական Օրհնութեամբ:

  Ներկաները ապրեցան բացառիկ երաժշտական երեկոյ մը: Փառք Աստուծոյ:

 

 

 

Հ Ո Վ Ո Ւ Ա Կ Ա Ն   Դ Ա Ս Ա Ր Ա Ն

-Երկուշաբթի, 23 Յունուար 2012, երեկոյեան ժամը՝ 9-ին.

 

-Հինգշաբթի, 26 Յունուար 2012, առաւօտեան ժամը՝ 9-ին.

 

Էմմանուէլ Եկեղեցիին սրահին մէջ:

 

 

 

ՏԻԿՆԱՆՑ ՊԱՇՏԱՄՈՒՆՔ... Հինգշաբթի, 19 Յունուարի պաշտամունքը առաջնորդեց՝ Տիկ. Մարիէթ Գասպարեան, փառաբանութեան երգերով, 34-րդ Սաղմոսի եւ «Խրատ Իւրաքանչիւր Հայորդիի» գրութեան ընթերցումով: Ապա տեղի ունեցաւ աղօթքի պահ:

Տիկ. Հուրի Մուսա Օղլի փոխանցեց օրուան հոգեւոր նիւթը՝ «Մանանեխի  Հաւատք», հիմնուած՝ Մատթ. 17.19 եւ 13.31 համարներուն վրայ: Ան անդրադարձաւ մանանեխի օգտակարութեան եւ չափին, նմանցնելով զայն Աստուծոյ Թագաւորութեան եւ եզրափակեց թէ այս դժուար եւ տագնապալի օրերուն մէջ պէտք չէ յուսայատինք, այլ՝ մանանեխի հատիկի չափ եթէ հաւատք ունինք պիտի համբերենք եւ պիտի յաղթենք այս չար աշխարհին:

Պաշտամունքը վերջ գտաւ յայտարարութիւններով եւ բաժանման աղօթքով:

 

 

 

ՀԱՅ ԱՒԵՏ. ԷՄՄԱՆՈՒԷԼ ԵԿԵՂԵՑԻԻ ՏԻԿՆԱՆՑ ՊԱՇՏԱՄՈՒՆՔ

 

ԱՍՏՈՒԱԾԱՇՈՒՆՉԻ ՍԵՐՏՈՂՈՒԹԻՒՆ

Յ Ա Յ Տ Ն Ո Ւ Թ Ի Ւ Ն   Յ Ո Վ Հ Ա Ն Ն Ո Ւ

 

ՎԵՐ. ՍԵՐՈԲ ՄԿՐՏԻՉԵԱՆ

 

Հինգշ., 26 Յունվ. 2012, կ.ա. ժամը՝ 10-ին, Էմմ. Եկեղեցւոյ սրահին մէջ:

 

 

 

 

 

 

...ՆՈՒԻՐԱՏՈՒՈՒԹԻՒՆՆԵՐ...

Ամանորի եւ Սուրբ Ծնունդի ուրախ առիթով.-

Տէր եւ Տիկ. Հմայեակ եւ Սիլվա Քասունի (Քուէյթ)   Եկեղեցիին 5000 ս.ո.

 

Իրենց Ծնողաց՝ Գէորգ եւ Ալիս Անուշեաններու յիշատակին.-

Տէր եւ Տիկ. Աբրահամ եւ Լուսին Պետրոսեան       Կիրակն. Դպրոցին 1000, 

                Եկեղեցիին 500, Տիկնանցին 500, Լրատուին 500, «Շող»ին 500 ս.ո.

 

ՇՆՈՐՀԱԿԱԼՈՒԹԻՒՆ... Տիար Վահէ Մանուկեանին, որ հիւրասիրեց Եկեղեցիիս ժողովուրդը անցեալ Կիրակի օր, իր ծնողաց՝ Վահրամ եւ Ալիս Մանուկեաններու յիշատակին:

 

 

 

[Back to News]